-
2023-02-01 13:01:18+00:00
2021 йилда Ўзбекистонда вояга етган аҳолининг атиги 3 фоизи ўз жамғармаларини банкларда сақлаган. Бу мамлакатнинг банк-молия тизимига ишончи пастлигидан далолат беради, дейилади Жаҳон банки мутахассислари эълон қилган материалларда.
Мақолада қайд этилишича, ўзбекистонликларнинг аксарияти банк ҳисоб рақамлари ва омонатлардан кўра чорва моллари, олтин, валюта ва автомобил каби активларга сармоя киритишни афзал кўради.
“Биз банклардан унчалик фойдаланмаймиз. Биз бошқа йўллар билан пулларни жамғаришимиз мумкин: чорва молларини сотиб оламиз, уларни боқиб, қайта сотамиз. Ёки чет эл валютасини сотиб оламиз – чунки валюти бизда ҳеч қачон арзонлашмайди”, — дея Фарғона вилоятида яшовчи фуқаронинг сўзларидан иқтибос келтирган Жаҳон банки.
-
2023-02-02 12:42:02+00:00
Bloomberg нашри дунё миллиардерлари бўйича янги рўйхатини эълон қилди.
Эътиборлиси, унда асли ўзбекистонлик Алишер Усмоновнинг бойликлари 19,7 млрд долларга етган. Усмонов йил бошидан бери 1,26 млрд доллар топган ва рейтингда 81-ўринни эгаллаб турибди.
-
2023-02-06 14:01:44+00:00
2023 йилнинг дастлабки “Ташаббусли бюджет” жараёнлари бошланди.
“Ochiq budjet” ахборот портали орқали бугун 6 февралдан бошлаб 26 февралга қадар таклиф киритиш имконияти мавжуд.
-
2023-02-07 12:14:24+00:00
Банклараро тўловларни қабул қилиш 17:30гача узайтирилди.
-
2023-02-08 16:22:02+00:00
Дунёнинг энг йирик крипто биржаларидан бири Binance доллардаги операцияларни тўхтатди. Компания бунинг сабабига ҳали тўхталиб ўтмаган.
Бу қарор Binance US учун таалуқли эмас ва АҚШнинг ичида доллар операциялари давом этаверади. Операциялар фақатгина АҚШдан ташқарида тўхтатилган.
-
2023-02-09 12:02:10+00:00
Банкир канали мижозларни энг кўп қизиқтирадиган кредитлар ҳақида маълумотлар бериб келмоқда. Мазкур кредитлар ҳақидаги батафсил маълумотларни битта постга тўпладик.
▶️ Ипотека кредитлари
▶️ Иккиламчи бозор учун ипотека #1 #2
▶️ Автокредитлар
▶️ 0 фоизли автокредитлар
▶️ Электромобиллар учун 0 фоизли автокредитлар
▶️ Микроқарзлар
▶️ Кредит карталари
▶️ Омонатлар
-
2023-02-10 14:12:39+00:00
Марказий банк томонидан ишлаб чиқилган “Банк ҳисобварақларини очиш, юритиш ва ёпиш тартиби тўғрисида”ги йўриқнома Адлия вазирлигида 2023 йил 8 февраль куни 3420-сон билан давлат рўйхатидан ўтказилди.
Мазкур ҳужжат банк ҳисобварақларини очишни ва уларни юритишни тартибга солувчи ҳужжатлардаги, жумладан, “Ўзбекистон Республикаси банкларида очиладиган банк ҳисобварақлари тўғрисида”ги йўриқнома (рўйхат рақами 1948, 2009 йил 27 апрель) ва “Ўзбекистон Республикаси банк депозиторларининг Миллий ахборотлар базаси ва унда мижозларга хос рақам бериш ҳамда банк ҳисобварақлари рўйхатини юритиш тартиби тўғрисида”ги низом (рўйхат рақами 1863, 2008 йил 27 сентябрь) нормаларини ягона ҳужжатга бирлаштириш ҳамда банк ҳисобварақларини очишда халқаро тажрибага мувофиқ бизнес жараёнларни рақамлаштиришни ҳисобга олган ҳолда ишлаб чиқилди.
Ушбу йўриқнома билан:
таъсисчилари Ўзбекистон Республикаси резидентлари бўлган юридик шахслар ҳамда якка тартибдаги тардбиркорларга банк ҳисобварақларини 2023 йил 1 майдан бошлаб, нафақат давлат рўйхатидан ўтиш жараёнида, балки фаолияти давомида ҳам банк ҳисобварақларини масофадан туриб очишга рухсат берилиши;
имзолар намуналари қўйилган варақча шакли ва тақдим этиладиган сони банк томонидан ички ҳужжатларига мувофиқ ўрнатилиши;
ҳисобварақни очиш учун тақдим этиладиган ҳужжатларни электрон сақлаш имконияти бўлганда, қоғозда сақламаслик ҳуқуқи берилмоқда;
ногиронлиги бўлган шахсларга факсимил имзодан фойдаланишга рухсат берилиши;
хўжалик субъектига асосий ҳисобварақ очган банк орқали ўзининг барча банклардаги ҳисобварақлари рўйхатини Банк депозиторларининг миллий ахборот базасидан олиш имконияти берилиши;
ғазна ижроси билан қамраб олинган юридик шахсларга асосий ҳисобварақ очмасдан, бошқа ҳисобварақлар (транзит, терминал, нақд пул учун, корпоратив карта) очиш мумкинлиги;
барча жисмоний шахсларга ягона идентификатор – жисмоний шахснинг шахсий идентификацион рақами (ЖШШИР) асосида ҳисобварақ очилиши;
норезидент жисмоний ва юридик шахсларга банк ҳисобварақларини очишда ва уларга маблағларни кирим қилишда “Ўз мижозингни бил” (KYC, e-KYC) ва “Даромадни легаллаштиришга қарши курашиш” (AML) тизимларига мувофиқ банклар томонидан асословчи ҳужжатлар олиниши мумкинлиги бўйича нормалар белгиланмоқда.
-
2023-02-11 18:45:27+00:00
❗️Тошкентда сифатсиз уйларни қуриб, фуқароларга алдов йўли билан сотган МЧЖ раҳбари 8 йил 2 ой муддатга қамалгани маълум бўлди.
Ҳозирда фуқароларга тўланадиган компенсация Тошкент шаҳар судида кўриб чиқилмоқда.
Жиноят иши доирасида қурилишга алоқадор яна бир шахс терговдан яширинганлиги сабабли унга қидирув эълон қилинган.
-
2023-02-13 15:09:13+00:00
Россияликлар Ўзбекистонда кўпроқ компания оча бошлади
Ўзбекистонда 2023 йилнинг январ ойида 207 янги чет эл компаниялари ташкил қилинди. Уларнинг 147 таси Тошкентда.
Ўтган ой хорижий капитал иштирокида йўлга қўйилган янги компаниялар сони сўнгги уч йилдаги энг юқориси бўлди.
Давлатлар кесимида россияликлар январ ойида Ўзбекистонда 66 та янги компания очди. Бу ўтган йилнинг шу даврига нисбатан қарийб уч баравар кўп — 23 та.
Бу Ғарб томонидан киритилган санкциялардан қочиш мақсадида кўплаб Россия компаниялари ўз бизнесини Ўрта Осиёга кўчираётгани билан изоҳланади.
Жорий йил январ ойида янги ташкил қилинган Хитой компаниялари иккинчи (23 та) бўлган бўлса, турк капитали иштирокидаги янги компаниялар учинчи (18 та) бўлди.
Ўзбекистонда фаолият олиб бораётган Россия компанияларининг умумий сони 3,1 мингтага етган. Бу энг яқин Туркиядан 999 тага кўп.
-
2023-02-14 12:41:02+00:00
S&P Ўзбекистон иқтисодиёти 2023 йилда 5 фоизга ўсишини прогноз қилмоқда
S&P Global Ratings минтақадаги ва бутун дунёда мураккаброқ геосиёсий вазиятга қарамай, Ўзбекистонда иқтисодий тикланиш давом этади, деб ҳисобламоқда.
Агентликнинг таъкидлашича, Ўзбекистон 2022 йилда Россия ва Украина ўртасидаги уруш оқибатларини кутилганидан яхшироқ енгиб ўтган. Бунга асосан Россиядан пул ўтказмаларининг кескин кўпайиши сабаб бўлган.
“Биз 2023 йилда ялпи ички маҳсулотнинг ўсиши 5 фоиз атрофида, 2024-2025 йилларда эса 5,5 фоизни ташкил этишини прогноз қилмоқдамиз”, — дейилади S&P Global Ratings ҳисоботида.
Шунингдек, S&P 2022 йилда кузатилган катта ҳажмдаги пул ўтказмалари вақтинча бўлиши, 2023 йилда кўрсаткич пасайиши мумкинлигини таъкидлаган.
S&P кутилмаси ҳукумат томонидан қилинган прогнозга нисбатан 0,3 фоизга пастроқ.
S&P Global Ratings — Америка кредит рейтинги агентлиги ва S&P Global компаниясининг акциялар, облигациялар ва товарлар бўйича молиявий тадқиқотлар ва таҳлилларни нашр этадиган бўлими. S&P, Moody’s ва Fitch’ни ҳам ўз ичига оладиган Катта учлик кредит рейтинг агентликларининг энг каттаси ҳисобланади.
-
2023-02-15 15:54:47+00:00
🏘Ипотека кредитларини олиш энди анча осонлашди!
Қандай қилиб паст фоизлик ипотека кредитлари ва уларга субсидиялар олиш мумкин?
Барчаси ҳақида шу ерда билиб олинг!
-
2023-02-16 15:15:05+00:00
Дунё бўйлаб офис ходимлари рекорд даражада кўп чарчамоқда
Офисда ишлайдиганларнинг 42 фоизи иш давомида чарчоқни ҳис қилмоқда — бу кўрсаткич пандемия давридагидан ҳам юқори. Бу ҳақда Future Forum тадқиқот марказига таяниб Bloomberg хабар бермоқда.
Тадқиқотга кўра, ишчилар иқтисодий ноаниқлик, ишдан бўшаш қўрқуви ва офисга қайтишга мажбурланишлар оқибатида босим остида қолмоқда. Сўровда қатнашганларнинг ярмидан кўпи иш жадвалининг мослашувчан эмаслигидан норози бўлган.
Мазкур тадқиқот ҳар чоракда АҚШ, Буюк Британия, Япония, Австралия, Германия ва Францияда ўтказилади.
-
2023-02-17 12:27:02+00:00
Европа давлатлари энергетика инқирозини бартараф этиш учун сўнгги икки йилда қанча маблағ сарфлади?
-
2023-02-18 15:20:03+00:00
UzVC Миллий венчур жамғармаси ўқув марказларини онлайн автоматлаштириш платформаси — Modme стартапини молиялаштирди.
Modme ўқув марказларини онлайн автоматлаштириш платформаси ҳисобланади. У ҳозирда 50 000 талаба ва кунлик 300 нафар фаол мижозга эга.
Modme маҳсулотлари ёрдамида ўқув марказини бошқариш анча осонлашади, талабалар ва уларнинг ота-оналари эса оддий иловада шахсий кабинети орқали барча керакли маълумотларни олишлари мумкин бўлади.
Стартап нафақат Ўзбекистон, балки Қозоғистон ва Тожикистон бозорларини ҳам қамраб олишни режалаштирган.
-
2023-02-19 05:43:04+00:00
Райффайзенбанк АҚШ Молия вазирлиги томонидан текширилмоқда
АҚШ молия вазирлиги ушбу банкни Россия билан боғлиқ бизнесларини текширишни бошлади. Вазирликнинг халқаро активларни назорат қилиш бошқармаси (OFAC) банкка Украина ва Россия билан боғлиқ транзакциялар бўйича сўров юборган.
Банк расмийлари Райффайзенбанк санкцияларга тўлиқ риоя қилаётганини маълум қилишмоқда.
Жорий йил бошиданоқ банк бир неча Россия банклари билан хорижий валютада операцияларга чеклов киритган.
Райффайзенбанк ўтган йили тахминан 3,8 миллиард евро соф фойда кўрди, бунинг катта қисми яъни 2 млрд евроси Россиядаги бизнесидан олинган. Aйни пайтда, Россия жамғармалари банкка 20 миллиард евродан ортиқ маблағ жойлаштирган ва бу банк Россия учун аҳамиятли хорижий банклардан бири ҳисобланади.
-
2023-02-20 14:41:01+00:00
2022 йилда 34,5 трлн сўмлик солиқ имтиёзлари берилган. Шундан 29 трлн сўми ёки жами имтиёзларга нисбатан 84 фоизи Солиқ кодексига мувофиқ ажратилган имтиёзлардир.
Имтиёзлар умумий ҳажмида ҚҚС ҳисобига 27,5 трлн сўм тўғри келмоқда. Шунга қарамай, 2022 йилда ҚҚС бўйича нол ставкани қўллаш натижасида экспорт ва унга тенглаштирилган хизматлардан 29,5 трлн сўмлик ҚҚС ҳисобланмаган.
Солиқ кодексига мувофиқ молиявий хизматлар бўйича банклар, суғурта ташкилотлари ва хизматларига ҳам имтиёзлар қўлланилади. 2022 йилда мазкур институтларга берилган имтиёзлар суммаси 14,1 трлн сўмни ташкил қилди.
-
2023-02-21 14:14:34+00:00
Январда автомобил олди-сотдиси кўпайди
Ўзбекистонда 2023 йил январ ойида сотилган енгил автомобилларнинг умумий сони ўтган йилнинг декабрига нисбатан 18 фоизга ўсган ҳолда 118 мингтани ташкил этди.
Автомобиллар сотуви бўйича Самарқанд (85 фоизга), Фарғона (44 фоизга) ва Наманган вилоятларида (31 фоизга) сезиларли ўсиш кузатилди.
2022 йилнинг январига нисбатан енгил автомобиллар сотуви деярли 20 фоизга ошди.
Бир ой давомида бирламчи бозорда рўйхатдан ўтган автомобиллар сони 71 фоизга ошди. 2022 йилнинг январига нисбатан бирламчи бозор 5,6 фоизга ўсди.
Январда Ўзбекистонда ишлаб чиқарилган янги автомобиллар сотуви 23,4 мингтани ташкил этиб, декабрга нисбатан 71 фоизга ўсди (2022 йил январига нисбатан — 2 фоизга ўсди).
Янги хорижда ишлаб чиқарилган автомобиллар сотуви эса декабрга қараганда 75 фоизга ўсиб, 2,5 мингтани ташкил этди (2022 йил январига нисбатан ўсиш 60 фоиз).
Ўтган ойда 92 минг дона эски автомобиллар ҳам сотилди. Бу декабрга нисбатан 8,9 фоизга, 2022 йилнинг январига нисбатан 24 фоизга кўпдир.
-
2023-02-22 15:27:02+00:00
Ўзбекистонда тизимли аҳамиятга молик банклар аниқланади
Марказий банк бошқарувининг 2023 йил 18 февралдаги қарори билан Тизимли аҳамиятга молик банкларни аниқлаш тартиби тўғрисидаги низом тасдиқланди.
Низомга мувофиқ, мамлакат банк тизими барқарорлигига сезиларли таъсир қилиши мумкин бўлган тизимли аҳамиятга молик банклар 4 та мезон асосида аниқланади. Жумладан, банклар:
банк ҳажми — банк активлари ва балансдан ташқари моддалари ҳажмининг барча банклар умумий активлари ва балансдан ташқари моддалари жами ҳажмидаги улуши;
банкнинг банк тизими иштирокчилари билан ўзаро боғлиқлиги — банкнинг бошқа банкларда жойлаштирилган активлари ва унинг бошқа банклар олдидаги мажбуриятлари ҳажмининг барча банкларнинг бошқа банклардаги активлари ва улар олдидаги мажбуриятлари жами ҳажмидаги улуши;
банкнинг қамрови — банкнинг маҳаллий тўловлар ва ўтказмалар ҳажми ва сонининг, иқтисодиёт тармоқлари кесимида ажратилган кредитлар ҳажмининг, банкдаги омонатлар ҳажмининг банк тизими бўйича тегишли жами кўрсаткичлардаги улушлари ҳамда банкнинг хизмат кўрсатиш нуқталари сони;
банк операциялари мураккаблиги — банкнинг трансчегаравий (халқаро) мажбуриятлари суммасининг Ўзбекистондаги барча банклар трансчегаравий мажбуриятлари умумий суммасидаги улуши асосида баҳоланади.
Мазкур Низом асосида тизимли аҳамиятга молик банклар аниқланиб, ундан дастлаб ушбу банклар фаолияти устидан мутаносиб назорат ўрнатиш, уларни масофадан назорат қилувчи назоратчилар (кураторлар) бириктириш каби назорат тадбирларини йўлга қўйишда фойдаланилади.
Навбатдаги босқичда эса, тизимли аҳамиятга молик деб эътироф этилган банкларга нисбатан “Банклар ва банк фаолияти тўғрисидаги” қонуннинг 38-моддасига мувофиқ пруденциал нормативларга қўшимча устамалар (буфер) белгилаш масалалари кўриб чиқилади.
-
2023-02-23 15:23:52+00:00
G7 давлатлари 2023 йилда Украинага 39 млрд доллар ёрдам беради
Буюк Британия, Германия, Италия, Канада, Франция, Япония ва АҚШни ўз ичига олган G7 (Катта еттилик) давлатлари Украинага 39 млрд доллар молиявий ёрдам жўнатиш ниятида эканликларини маълум қилди.
Россия ва Украина ўртасида уруш бошланганидан бери АҚШнинг ўзи Украинага 13 млрд доллар ажратди.
-
2023-02-24 14:34:02+00:00
Россиянинг энг бой одамлари бир йиллик урушдан кейин 67 млрд доллар йўқотди
Энг бой 23 нафар россиялик миллиардернинг умумий бойлиги 2022 йил 23 февралда, Владимир Путин қўшинлари Украинага бостириб киришидан бир кун олдин 339 млрд долларга тенг эди.
Роппа-роса бир йил ўтиб Россиялик миллиардерлар умумий 67 млрд доллар йўқотишди. Бу Bloomberg Billionaires Index'даги қолганлардан тўрт баравар кўп.
Россиялик миллиардерлар рўйхатида Ўзбекистонда туғилган Алишер Усмонов ҳам бор. Унинг бойлиги Украинада уруш бошлангандан бери 1,2 фоизга кўпайган. Усмонов 24 февралдан бери бойлиги кўпайган уч нафар россиялик миллиардердан бири.
-
2023-02-25 10:24:07+00:00
Хитойнинг автомобил экспорти энг юқори суръатларда ўсмоқда. Германия эса ўз экспортининг қарийб ярмидан мосуво бўлиш арафасида.
-
2023-02-27 11:04:07+00:00
Доллар тушди
28 февраль куни амал қиладиган долларнинг расмий курси 11320,01 сўмдан (-29,99 сўм) ҳисобланади.
-
2023-02-27 14:09:47+00:00
Ўзбекистонда жорий йилнинг 1 феврал ҳолатига жами банк тизими бўйича активлар 558,5 трлн сўмни ташкил қилган ва ўтган йилга нисбатан +123,7 трлн сўмга ортган.
Давлат банклари ичида активлари жиҳатидан Миллий банк (118,2 трлн сўм), Ўзсаноатқурилишбанк (66,2 трл сўм) ва Агробанк (54,7 трлн сўм) кучли учликни ташкил қилмоқда. Хусусий банклар ичида Капиталбанк (29,2 трлн сўм) етакчи.
-
2023-02-28 16:19:01+00:00
Февралда 0,5 фоизлик инфляция қайд этилди
2023 йилнинг февралида ўтган ойга нисбатан 0,5 фоизга нархлар ошди. Йиллик нисбатда (ўтган йилнинг февралига нисбатан) ушбу кўрсаткич 112,2 фоизга етди.
Январда 0,8 фоизлик инфляция қайд этилган эди. Шу тариқа йил бошидан бери нархлар 1,4 фоизга кўтарилди.
Февралда озиқ-овқат маҳсулотлари ва спиртсиз ичимликлар 0,8 фоизга, спиртли ичимликлар ва тамаки маҳсулотлари 0,3 фоизга қимматлади. Энг юқори нархлар ошиши транспорт бўлимида қайд этилди — 2 фоиз.
Шунингдек, ўтган ой пиёз 9,8 фоизга, помидор 9,3 фоизга, бодиринг 9,2 фоизга қимматлаган. Йил бошидан бери пиёз нархлари 59 фоизга, ўтган йилнинг февралига нисбатан эса 197,2 фоизга ошган.
Шунга қарамай, расмий статистикага кўра, йил бошидан бери нархлар ошиши сўнгги тўрт йилликдаги энг паст кўрсаткичда бўлиб қолмоқда.