-
2023-01-03 15:12:31+00:00
Намеснік кіраўніцы Аб’яднанага Пераходнага Кабінета Валер Кавалеўскі знаходзіцца з працоўным візітам у Вашынгтоне
Падчас візіту запланаваны сустрэчы ў Пентагоне, Дзяржаўным дэпартаменце і Радзе нацыянальнай бяспекі ЗША, у камітэтах па замежных справах абедзвюх палат Кангрэса ЗША, у аналітычных цэнтрах і з беларускай дыяспарай.
Ключавымі для запланаваных сустрэч стануць наступныя тэмы:
▪️ падтрымка ЗША і міжнароднай супольнасцю намаганняў беларусаў у справе абароны незалежнасці і суверэнітэту Беларусі
▪️ меры па рэагаванні на пашырэнне удзелу рэжыму Лукашэнкі ў расійскай агрэсіі супраць Украіны
▪️ каардынацыя дзеянняў на міжнароднай арэне ў справе абароны незалежнасці і суверэнітэту Беларусі і аднаўлення дэмакратыі
▪️ павелічэнне дапамогі ЗША для беларускай грамадзянскай супольнасці, у тым ліку, рэпрэсаваных і палітзняволеных
▪️ актывізацыя ўдзелу Кангрэса ЗША у беларускім пытанні
-
2023-01-04 17:38:50+00:00
«Праведзены комплекс мерапрыемстваў па павышэнні боегатоўнасці частак і сіл спецыяльных аперацый, і гэта дакладна не для трэніровак»
Прадстаўнік па абароне і нацыянальнай бяспецы Аб’яднанага Пераходнага Кабінета пракаментаваў тэлеканалу «Белсат» інфармацыю аб магчымым правядзенні мабілізацыі ў Беларусі ў бліжэйшы час:
«Інфармацыя мае пад сабой вельмі сур’ёзныя падставы. Пытанне пра дату застаецца адкрытым. Але праведзена шмат дарагіх падрыхтоўчых мерапрыемстваў, якія проста так ніхто ніколі не праводзіць: вельмі сур’ёзна разгорнута прыватная беларуская кампанія «ГардСэрвіс», нанята вялікая колькасць супрацоўнікаў на вялікія заробкі, праведзены комплекс мерапрыемстваў па павышэнні боегатоўнасці частак і сіл спецыяльных аперацый — такога не рабілася яшчэ ніколі ў гісторыі самастойнай Беларусі, і гэта дакладна не для трэніровак.
Таксама Валерый Сахашчык паведаміў, што паспяхова адбываецца фарміраванне і камплектаванне беларускай вайсковай часткі ў складзе Узброеных Сіл Украіны.
Адносна беларускіх сілавікоў, якія застаюцца на службе Сахашчык заўважыў: «Кожнаму разумнаму чалавеку павінна быць зразумела, што рэжыму засталося зусім няшмат, і ўсе гэтыя людзі пасля могуць стаць фігурантамі крымінальных спраў. І таму кожны разумны чалавек зараз павінны — няхай не рабіць подзвігаў, але — не здзяйсняць подласці. Каб пасля з чыстым сумленнем можна было жыць у нармальнай новай краіне»
Поўная гутарка — па спасылцы.
-
2023-01-04 12:20:29+00:00
«Нацыянальная культура і мова — нашая зброя, і ў такі час мы мусім скарыстацца ёй напоўніцу»
Прадстаўніца па нацыянальным адраджэнні Аб’яднанага Пераходнага Кабінета Аліна Коўшык распавяла пра тое, што азначае прысвячэнне 2023-га года — беларускай мове і нацыянальнаму адраджэнню, а таксама назвала напрамкі дзейнасці, якую плануецца ажыццяўляць у рамках абвешчанага Года:
«У гэтым годзе Аб’яднаны Пераходны Кабінет будзе спрыяць таму, каб пашырылася штодзённае ўжыванне беларускай мовы, каб стала больш беларускіх праектаў, якія скіраваны на гэта.
Што канкрэтна плануецца рабіць? Падрабязны план яшчэ дапрацоўваецца, але ўжо зараз магу сказаць, што мы будзем рабіць так, каб дарослым і дзецям было прасцей вывучаць беларускую мову. Будзем садзейнічаць стварэнню сеткі беларускіх школ. Будзем заахвочваць беларускія медыйныя пляцоўкі, у тым ліку блогераў і знакамітасцяў — больш ужываць беларускую мову для яе папулярызацыі.
Калі на самым пачатку працы ў Кабінеце я пачала збіраць інфармацыю пра розныя беларускія культурніцкія і адукацыйныя праекты, ініцыятывы, я ўбачыла, што існуе проста безліч выдатных, «лямпавых» праектаў, якія папулярызуюць нашую мову, культуру, гісторыю. Але пра гэтыя праекты мала хто ведае. І вось мы пастараемся падтрымаць іх, зрабіць так, каб інфармацыя пра іх была акумулявана, размешчана на адной пляцоўцы ў прывабным выглядзе.
Таксама будзем спрыяць беларускаму кнігавыданню. Мы — скарынаўская, кніжная нацыя. У нас заўжды быў высокі ўзровень адукаванасці. Але сёння рэжым спрабуе знішчыць і забараніць беларускую кнігу. Таму мы, па прыкладзе наватара Скарыны, зробім стаўку на новыя тэхналогіі: паспрыяем стварэнню цэлай бібліятэкі беларускіх аўдыё- і электронных кніг. Каб кнігі даходзілі да беларусаў, мы будзем удзельнічаць у наладжванні сістэмы іх распаўсюду.
Увогуле, нашая мэта — каб беларусы ўмацавалі сваю нацыянальную ідэнтычнасць, што асабліва важна для тых, хто з’ехаў за мяжу. І для ўсіх без выключэння беларусаў гэта важна ва ўмовах наступу “рускага міру”. Наша нацыянальная культура і мова — гэта сапраўдная зброя ў такі час. І мы мусім ёй скарыстацца напоўніцу, зважаючы на тое, што гэты год можа быць вырашальным».
-
2023-01-06 17:03:17+00:00
«Я веру, што гэтыя святы прынясуць цеплыню ў нашыя дамы, хоць бы на некалькі імгненняў»
Намеснік кіраўніцы Аб’яднанага Пераходнага Кабінета Павел Латушка павіншаваў беларусаў, якія адзначаюць Раство Хрыстова 7 студзеня:
«Памятаю, што заўсёды ў нашай сям'і ўвечары 6 студзеня, калі з'яўляецца на небе першая зорка, збіраліся за вячэрай, і галоўнай стравай падчас гэтай вячэры была бедная куцця, а багатую куццю падавалі на наступны дзень, 7 студзеня. Заўсёды была традыцыя 12 страў, посная ежа і, вядома ж, талерка для нечаканага госця. Але сёння ў нашых сем'ях гэтая талерка — для вельмі чаканых гасцей, людзей, якія знаходзяцца за кратамі. І ў маім доме гэта месца будзе для майго стрыечнага брата Анатоля Латушкі, палітвязня.
Беларусы — адзін з тых народаў, якія найбольш захавалі свае традыцыі. І ў гэтым нашая сіла, якая дапаможа перажыць жудасную навалу сённяшніх дзён»
Поўную версію віншавання — глядзіце ў відэа.
-
2023-01-06 06:16:51+00:00
«Нам спадабалася гуляць у дэмакратыю ў 2020-м, а цяпер нас чакае вялікая праца над сабой»
Прадстаўніца па сацыяльных пытаннях Аб’яднанага Пераходнага Кабінета Вольга Гарбунова распавяла ў інтэрв’ю «Люстэрку» пра сваё бачанне палітыкі і сваёй ролі ў ёй:
🔘 «Гэта пэўныя магчымасці казаць пра тое, што мяне турбуе як жанчыну, як палітвязня, як чалавека, які быў вымушаны пералезці праз плот, каб уратавацца ад пераследу, як прадстаўніцу супольнасці ЛГБТК»
🔘 «Назіраючы, як у якім-небудзь Рэйк’явіку мэрам горада становіцца панк-анархіст, я думаю: «А так можна было?» І ў мяне такое ўражанне, што нас падманвалі ўвесь гэты час»
🔘 «Наша задача нагадваць міжнароднай супольнасці, што ўся краіна сядзіць у турме»
🔘 «Я бачу сваёй задачай умацаванне той вялізнай працы, якая ўжо праводзіцца праваабаронцамі і актывістамі»
🔘 «Размаўляю з блізкімі зняволеных і ведаю, што некаторыя з іх у безвыходным фінансавым становішчы. Я не хачу, каб гэтыя людзі думалі, што іх забылі»
-
2023-01-12 11:48:25+00:00
Святлана Ціханоўская – пра паслядоўную пазіцыю ў дачыненні да рэжыму і яго саўдзелу ў вайне
«Мы разумеем, што ўлады Украіны не хочуць правакаваць Лукашэнку. Але калі з’яўляюцца думкі пра тое, што гэта яго спыніць, – яны памылковыя. У пачатку 2022 ён абяцаў Украіне, што не будзе нападу. Мы ведаем, да чаго гэта прывяло.
Лукашэнка ніколі не трымае слова і будзе рабіць тое, што скажа Расія. Ён не выпадкова апынуўся ў такой сітуацыі. Ён не закладнік і не ахвяра – ён абраў інтэграцыю з Расіяй яшчэ ў 90-х, калі пачаліся падпісанні дакументаў пра саюзную дзяржаву. Ягоная палітыка прывяла да пачатку вайны супраць Украіны, а таксама да пагрозы незалежнасці Беларусі. Яго саўдзел у вайне дазволіў адбыцца генацыду ў Бучы, Ірпені, Чарнігаўскай і Кіеўскай абласцях.
Таму саступкі яму ў разгар вайны толькі ствараюць для яго пачуццё беспакаранасці. Так ён упэўніваецца, што можа і далей праводзіць рэпрэсіі, забіваць людзей і дазваляць нападаць на Украіну з тэрыторыі Беларусі. А задача цывілізаванага свету – пазбегнуць беспакаранасці. Вінаватыя павінны панесці адказнасць – і нашая агульная задача гэтага дабіцца.
Беларусы, пра чые інтарэсы сапраўды трэба думаць – гэта беларускія актывісты, добраахвотнікі і валанцёры, якія дапамагаюць Украіне і змагаюцца супраць Расіі. Гэта людзі, якія сталі палітзняволенымі за свой пратэст супраць вайны ва Украіне і дыктатуры. Але дакладна гэта не Лукашэнка, які дае тэрыторыю Беларусі рускім салдатам і ракетам».
-
2023-01-12 09:31:57+00:00
«Яны блакуюць, і самі чытаюць тое, што блакуюць. Бо самі няздольныя стварыць хоць нешта падобнае»
Прадстаўніца па нацыянальным адраджэнні Аб’яднанага Пераходнага Кабінета Аліна Коўшык выказала словы падтрымкі галоўнаму рэдактару партала «ТУТ БАЙ» Марыне Золатавай і генеральнаму дырэктару «ТУТ БАЙ МЕДЫЯ» Людміле Чэкінай і пракаментавала суд над імі:
«Яны судзяць кіраўніцтва «ТУТ БАЙ», яны далей блакуюць сацсеткі «Люстэрка». Блакуюць, і самі чытаюць тое, што блакуюць. Баяцца і чытаюць. Бо не маюць іншых крыніц аб’ектыўнай інфармацыі аб грамадстве і яго настроях. Бо самі няздольныя стварыць хоць нешта падобнае. Бо «ТУТ БАЙ» і яго працяг, «Люстэрка» — гэта якасць, гэта аб'ектыўнасць, гэта нерв грамадства. Блакуюць — і гэтым прызнаюць, што хочуць прымусіць непакорлівае грамадства замаўчаць, перастаць казаць пра свае праблемы. Бо яны даўно ўжо не здольныя вырашаць гэтыя праблемы. Бо яны даўно ўжо не прадстаўляюць інтарэсы грамадства.
Людзі, якія рабілі «ТУТ БАЙ» і робяць сёння «Люстэрка» — наш гонар. Яны выпрацавалі такія стандарты журналістыкі, якія сталі ўзорам для іншых. І што б зараз не зрабіў рэжым — я пераканана, што мы аднойчы набярэм у пошукавым радку звыклыя нам літары «tut...» — і партал адкрыецца. Партал у новую Беларусь, дзе грамадства і чыноўнікі слухаюць адзін аднога праз пляцоўкі незалежных СМІ, каб агульныя для ўсёй краіны праблемы вырашаліся, а не замоўчваліся.
У гэтыя дні я хачу выказаць сваю пашану і падтрымку Марыне Золатавай, Людміле Чэкінай, а таксама ўсяму калектыву нацыянальнага партала «ТУТ БАЙ», які ўжо стаў часткай нашай гісторыі, і, я ўпэўнена, аднойчы адновіць сваю працу»
-
2023-01-14 16:05:43+00:00
Прадстаўнік Кабінета Валерый Сахашчык у разгорнутым інтэрв’ю на канале «Жыццё-маліна» распавёў пра свае жыццёвыя прынцыпы, дзейнасць ва Украіне, настроі ў беларускай арміі і перспектывы рэжыму
https://youtu.be/MXrXcVXMJ_0
-
2023-01-14 09:09:22+00:00
⚡️ Прадстаўнік Кабінета Валер Кавалеўскі і дырэктар Дэпартамента міграцыі МУС Літвы Эвеліна Гудзінскайтэ абмеркавалі працэдуру выдачы неабходных дакументаў грамадзянам Беларусі, якія знаходзяцца ў Літве і не могуць аднавіць свой страчаны або памяняць пратэрмінаваны пашпарт
Падчас сустрэчы Валер Кавалеўскі і Эвеліна Гудзінскайтэ разам з іншымі прадстаўніцамі Дэпартамента абмеркавалі працэдуру выдачы дакументаў грамадзянам Беларусі, якія цяпер знаходзяцца ў Літве і па аб'ектыўных прычынах не могуць памяняць пашпарты, што сталі несапраўднымі з-за сканчэння тэрміну дзеяння або страты. Пасля канчатковай дапрацоўкі працэдуры Аб'яднаны Пераходны Кабінет апублікуе інфармацыю аб умовах і спосабах атрымання такога дакумента.
Таксама на сустрэчы былі абмеркаваны іншыя праблемныя пытанні, з якімі сутыкаюцца беларусы ў Літве, іншых краінах ЕС і ва Украіне. Для іх вырашэння бакі дамовіліся на шэраг рэгулярных сустрэч.
-
2023-01-16 14:07:52+00:00
«Беларуская мова — гэта не толькі наш гонар, але і нашае права, якое мы павінны патрабаваць ад дзяржавы»
У новым відэа прадстаўніца па нацыянальным адраджэнні Аб’яднанага Пераходнага Кабінета Аліна Коўшык і дарадца Святланы Ціханоўскай Франак Вячорка параўноўваюць рэальную моўную сітуацыю ў Беларусі з тым, што павінна быць паводле Канстытуцыі, а таксама даюць практычныя парады па штодзённым выкарыстанні нацыянальнай мовы і барацьбе за свае моўныя правы.
https://youtu.be/xTsyQxC1_4Q
-
2023-01-17 20:59:25+00:00
❗️УВАГА❗️ дэзінфармацыя аб плане «Перамога» распаўсюджваецца сярод карыстальнікаў Telegram
Рассылаецца інфармацыя з прапановай пацвердзіць сваю гатоўнасць удзельнічаць у плане «Перамога», адправіць адпаведнае паведамленне на несапраўдны акаўнт.
Не пераходзьце ні па якіх спасылках у такім паведамленні, не адпраўляйце ніякіх паведамленняў у адказ, заблакуйце акаўнт, з якога яно прыйшло.
Уся афіцыйная інфармацыя знаходзіцца выключна:
- у арыгінальным чат-боце плана «Перамога» t.me/plan_peramoga_bot
- у канале BYPOL t.me/by_pol
- у канале Аб’яднанага Пераходнага Кабінета Беларусі t.me/CabinetBelarus
-
2023-01-18 15:33:50+00:00
«Усе прадпрыемствы ваенна-прамысловага комплекса, якія супрацоўнічаюць з Расіяй, павінны трапіць пад санкцыі»
Намеснік кіраўніцы Аб’яднанага Пераходнага Кабінета Павел Латушка ў інтэрв'ю «Радыё НВ» распавёў пра стаўленне беларусаў да мабілізацыі і ўдзелу беларускай арміі ў вайне супраць Украіны, паведаміў вынікі санкцыйнай працы і падзяліўся інсайдам аб вытворчасці дэталяў для расійскіх дронаў у Гомелі.
-
2023-01-19 18:40:56+00:00
🔥 «Лукашэнка не валодае міжнародным імунітэтам, няма прававых перашкодаў для прыцягнення яго да адказнасці»
Намеснік кіраўніцы Кабінета Валер Кавалеўскі — аб рэзалюцыі Еўрапейскага Парламента, якая заклікае стварыць спецыяльны міжнародны трыбунал над Лукашэнкам, ваенным і палітычным кіраўніцтвам Рэспублікі Беларусь:
«Пытанне адказнасці Лукашэнкі і прадстаўнікоў яго рэжыму за злачынствы супраць чалавечнасці ў дачыненні да беларусаў было ад пачатку прыярытэтным у дзейнасці дэмакратычных сіл, Аб’яднанага Пераходнага Кабінета.
Пасля пачатку агрэсіі супраць Украіны Лукашэнка разам з кіраўніцтвам краіны сталі датычнымі яшчэ і да ваенных злачынстваў. Мы вітаем рэзалюцыю Еўрапейскага Парламента з заклікам да трыбуналу над імі за іх удзел у ваенных злачынствах супраць Украіны.
Гэты важны крок адлюстроўвае кансалідаваную пазіцыю галоўнага прадстаўнічага органа Еўрапейскага Саюза адносна ролі Лукашэнкі ў гэтай вайне. Мы працягнем працаваць з нашымі міжнароднымі партнёрамі, каб трыбунал адбыўся.
Лукашэнка не валодае міжнародным імунітэтам, бо не з’яўляецца законна абраным прэзідэнтам. Таму няма прававых перашкодаў для прыцягнення яго да адказнасці»
-
2023-01-20 13:12:33+00:00
Павел Латушка сустрэўся з паслом Швецыі і перадаў яму прававое абгрунтаванне міжнароднага суда над Лукашэнкам і прызнання КДБ і ГУБАЗіК тэрарыстычнымі арганізацыямі
Намеснік кіраўніцы Аб’яднанага Пераходнага Кабінета Павел Латушка сустрэўся з паслом Швецыі ў Польшчы Стэфанам Гульгрэнам, падчас чаго яны абмеркавалі наступныя пытанні:
▪️міжнародны трыбунал за агрэсію супраць Украіны, юрысдыкцыя якога акрамя Лукашэнкі павінна распаўсюдзіцца на прадстаўнікоў вышэйшага ваеннага і палітычнага кіраўніцтва Беларусі;
▪️сінхранізацыя санкцый у дачыненні да Беларусі і Расіі, узмацненне санкцыйнага ціску на рэжым, ліквідацыя санкцыйных прабелаў ва ўжо прынятых санкцыях;
▪️фарміраванне групы дзяржаў-лабістаў дэмакратычнай Беларусі, якія будуць прасоўваць агульную стратэгію дзеянняў па дэмакратызацыі Беларусі, паколькі Швецыя заўсёды займае праактыўную пазіцыю ў беларускім пытанні;
▪️выпрацоўка сумесных падыходаў па пытаннях грамадзянства беларусаў, якія пражываюць за мяжой і могуць быць незаконна пазбаўлены грамадзянства нелегітымнай уладай па палітычных матывах;
▪️прызнанне КДБ і ГУБАЗіК тэрарыстычнымі арганізацыямі.
Стэфан Гульгрэн накіруе атрыманыя матэрыялы і прапановы для разгляду ў прававы дэпартамент МЗС Швецыі.
-
2023-01-22 18:14:48+00:00
Дзень «дыпламата» Лукашэнкі
Хачу «павіншаваць» «дыпламатаў» Лукашэнкі. Вы робіце ўсё магчымае, каб ператварыць беларускую дыпламатыю ў аксюмарон і пачаць адзначаць гэты дзень у статусе персон нон-грата ў любой цывілізаванай краіне.
https://youtu.be/hI13l2MNCGM
У аснове міжнародных адносін ляжаць народы і іх інтарэсы, а ў аснове працы дыпламата — прадстаўленне гэтых інтарэсаў і выбудоўванне на іх аснове ўзаемавыгадных адносін з партнёрамі.
Але вы не прадстаўляеце народ Беларусі. Не прадстаўляеце яго інтарэсы. Не прадстаўляеце Беларусь. Вы прадстаўляеце толькі Лукашэнку. І гандлюеце інтарэсамі беларусаў, па даручэнні дыктатара.
Вось, хто такі «беларускі дыпламат» сёння. І менавіта так на вас глядзяць у свеце. Віншую.
-
2023-01-23 10:14:22+00:00
Прадстаўніцтва па нацыянальным адраджэнні Аб’яднанага Пераходнага Кабінета ініцыявала заснаванне Інстытута беларускай кнігі
У Варшаве адбыўся ўстаноўчы сход па заснаванні Інстытута беларускай кнігі з удзелам пісьменнікаў, выдаўцоў і дзеячаў культуры.
Адзін з арганізатараў мерапрыемства, прадстаўніца па нацыянальным адраджэнні Кабінета Аліна Коўшык пракаментавала падзею:
«Думка пра Інстытут беларускай кнігі нарадзілася некалькі месяцаў таму, калі мы пачалі шчыльнае супрацоўніцтва з беларускімі выдаўцамі, якія зараз літаральна выжываюць пад гнётам рэпрэсій і вымушаных рэлакацый.
Зараз наша задача — уратаваць беларускія кнігі, зрабіць іх больш запатрабаванымі і дасяжнымі ў беларускім грамадстве і свеце. Будзем ствараць платформу для іх продажу, наладжваць супрацоўніцтва з бібліятэкамі замежных краін, каб яны больш закупалі беларускія кнігі, удзельнічаць у міжнародных выставах і піярыць там нашых аўтараў, каб іх болей перакладалі на замежныя мовы, бо нашая літаратура — вартая таго»
-
2023-01-24 16:17:05+00:00
«Выпусціце гэтых людзей — і пакажыце, што вы на самой справе гатовыя «зрабіць крок насустрач»
Прадстаўніца па сацыяльных пытаннях Аб’яднанага Пераходнага Кабінета Беларусі Вольга Гарбунова пракаментавала заяву рэжыму пра стварэнне камісіі для працы з грамадзянамі, якія хочуць вярнуцца з-за мяжы, і прапанавала вызваліць найбольш уразлівую групу палітвязняў:
«Сёння мы бачым, што рэжым нібыта гатовы прабачаць «тых, хто памыліўся». Варта нагадаць, як сотні людзей напісалі лісты на памілаванне — а гэта няпросты маральны выбар — і вызваленыя былі толькі адзінкі, прычым праігнараваныя былі запыты нават ад людзей з інваліднасцю і людзей сталага веку. Мы бачым, як рэжым заяўляе пра гатоўнасць пусціць у краіну былых удзельнікаў пратэсту, якія «пакаяліся», але ў рэальнасці мы ведаем, што мноства людзей затрымліваюць на мяжы з РБ па надуманых абвінавачваннях. Пакуль мы бачым, што рэжым кажа роўна супрацьлеглае таму, што робіць у цёмным куце. І як заўжды, пры гэтым стараецца выглядаць дабрадзеем.
Ну што ж, тады ў нас ёсць прапанова: праваабаронцамі падрыхтаваны «гуманітарны спіс палітвязняў», куды ўваходзяць людзі з інваліднасцю, цяжкімі захворваннямі, пенсіянеры, непаўнагадовыя, шматдзетныя бацькі, жанчыны, — якія не павінны знаходзіцца за кратамі па меркаваннях гуманнасці. Выпусціце гэтых людзей — і пакажыце, што вы на самой справе гатовыя «зрабіць крок насустрач»
-
2023-01-30 15:30:44+00:00
«Мне ўсе казалі: навошта табе гэтая беларуская мова? Але чым далей, тым больш яна станавілася для мяне вялікай перавагай»
У новым відэа прадстаўніца па нацыянальным адраджэнні Аб’яднанага Пераходнага Кабінета Аліна Коўшык распавядае, як зацікавіла свайго сына беларускай мовай праз футбол, а дарадца Святланы Ціханоўскай Франак Вячорка прызнаецца, што ў школе яго беларускамоўнасць дапамагала яму быць паспяховым у навучанні і звяртаць на сябе ўвагу дзяўчат.
Спікеры ў відэа даюць практычныя парады як пачаць карыстацца беларускай мовай штодзень, натхняюць на змаганне за моўныя правы, распавядаюць пра грамадскія ініцыятывы, якія дапамагаюць авалодаць беларускай мовай і ўтварыць уласнае камфортнае беларускамоўнае асяроддзе, а яшчэ — проста мараць пра новую Беларусь, дзе нацыянальная мова стане гонарам і адметнасцю беларусаў, будзе адкрываць новыя перспектывы для адукацыі і кар’еры.
Глядзіце поўную гутарку па спасылцы:
https://youtu.be/RKUHd6Di1VA