-
2023-02-01 08:20:30+00:00
🏦 Агробанк АҚШнинг энг йирик банкларидан бири билан вакиллик муносабатларини ўрнатди
Жорий йилнинг 31 январь куни "Агробанк" АТБ "дунёнинг глобал аҳамиятли банклари" қаторига кирувчи, АҚШнинг энг йирик ва қадимий банкларидан бири — The Bank of New York Mellon'да ўз вакиллик ҳисобварағини очди. Бу ҳақда Банк матбуот хизмати маълум қилмоқда.
Вакиллик ҳисобварағининг очилиши тўғридан-тўғри ҳисоб-китобларни амалга ошириш, халқаро пул ўтказмалари хизматларини ривожлантириш ҳамда жаҳон молия бозорида Агробанк мақомини мустаҳкамлашга йўналтирилган.
Маълумот учун, очилиш тарихи 1784 йилга тақалувчи The Bank of New York Mellon — америка холдинг компанияси бўлиб, 2007 йилда The Bank of New York и Mellon Financial Corporation'ларнинг бирлашувидан ташкил топган. Банкнинг 40 дан ортиқ мамлакатларда ваколатхоналари бўлиб, дунёдаги энг қадимги 20 банкдан бири ҳисобланади.
-
2023-02-02 08:13:55+00:00
🏦 Алоқабанк бошқарув раисининг биринчи ўринбосари тайинланди
2017 йилдан Маданият вазири ўринбосари лавозимида ишлаб келган Умиджон Абдураҳимович Қўқонбоев АТ "Алоқабанк" бошқаруви раисининг биринчи ўринбосари лавозимига тайинланди. Бу ҳақда Корпоратив ахборот порталида маълум қилинди.
У.Қўқонбоев 1979 йил туғилган. Меҳнат фаолияти давомида 1999-2017 йилларда АТ "Алоқабанк" тизимида турли лавозимларда, шу жумладан, 2010-2016 йилларда банк бошқаруви раиси ўринбосари, 2016-2017 йилларда банк бошқаруви раисининг биринчи ўринбосари лавозимида ишлаган.
Эслатиб ўтамиз, амалдаги меъёрий ҳужжатлар талабларига кўра, У.Қўқонбоев Марказий банк розилиги олингандан сўнг расман лавозим мажбуриятларини бажаришга киришиши мумкин.
Батафсил - https://bankers.uz/news/1031
-
2023-02-06 10:47:34+00:00
🏦 Агробанк Қамашидаги ҳолат юзасидан муносабат билдирди
Аввалроқ Агробанкнинг Қамаши филиали масъуллари маблағларни ўзлаштиришда гумон қилинаётгани тўғрисида хабар берилганди. Ушбу ҳолат юзасидан банк матбуот хизмати расмий муносабат билдирди.
Қайд этилишича, ушбу жиноий ҳолат банк томонидан ўтказилган режали комплаенс тадбирлари давомида аниқланган ва тегишли тартибга асосан тўпланган ҳужжатлар Қашқадарё вилояти прокуратурасига юборилган.
Расмий муносабатда амалдаги меъёрий ҳужжатлар талабларига кўра, "шахс суд ҳукмига асосан у ёки бу жиноятни содир этганликда айбдор деб топилмагунига қадар уни жиноят содир этишда айблаш ёки гумон қилиш мумкин эмаслигини, тергов материалларини оммавий ахборот воситаларида эълон қилиш тегишли рухсатларга асосан амалга оширилиши лозим"лигини эслатиб ўтилган.
Банк ҳолат юзасидан тегишли маълумотлар ўрнатилган тартибда тақдим этилишини маълум қилган.
Батафсил - https://bankers.uz/news/1035
-
2023-02-07 13:29:30+00:00
🏦 Ўзбекистон олтин-валюта захиралари $174 млнга кўпайди
Марказий банк 1 февралга Ўзбекистоннинг халқаро захиралари ҳолатини эълон қилди. Маълумотларга кўра, Ўзбекистоннинг халқаро захиралари ҳажми 35 млрд. 941,9 млн. АҚШ долларини ташкил қилмоқда.
Ўзбекистон Республикаси ялпи халқаро захиралари 2023 йилнинг январь ойида ўтган ойга нисбатан 174,4 млн. долларга кўпайди.
Захира активлар таркибида монетар олтин 23,56 млрд. долларни ташкил этмоқда. Бир ой олдинга нисбатан монетар олтин қиймати 491,7 млн. долларга кўпайган бўлса, олтиннинг физик ҳажми 370 минг унцияга камайган.
Ялпи захираларнинг валюта қисми 1 январь ҳолати билан солиштирганда камайиш ҳажми 331,3 млн долларни ташкил қилган. Валюта захиралари ҳозирда 11,3 млрд долларни ташкил қилмоқда.
-
2023-02-08 06:39:53+00:00
🏠 2023 йил ипотека кредитлари учун 1 трлн. сўм субсидия йўналтирилади
Норматив-ҳуқуқий ҳужжатлар лойиҳалари муҳокамаси порталига 2023 йилдаги давлат дастурига оид президент фармони лойиҳаси жойлаштирилди.
Унга кўра, 26 минг нафар фуқарога бозор тамойилларига асосланган ипотека кредитлари, шунингдек, 11 минг нафар фуқароларга бошланғич бадал ва фоиз тўловларининг бир қисмини қоплашга субсидиялар ажратиш учун Давлат бюджетидан 1 трлн. сўм миқдорда маблағлар йўналтирилади.
Батафсил: https://bankers.uz/news/1040
-
2023-02-09 06:11:08+00:00
🏦 Ўзагроэкспортбанк бошқарув раиси лавозимига россиялик мутахассис тайинланди
"Ўзагроэкспортбанк" АТБ кузатув кенгашининг жорий йил 27 январдаги қарорига кўра, россиялик мутахассис Артём Анатольевич Попов банк бошқаруви раиси, бошқарув аъзоси этиб тайинланди. Бу ҳақда Корпоратив ахборот ягона порталида маълум қилинган.
Қайд этилишича, 2017 йилдан банк бошқаруви раиси бўлиб ишлаб келган Наврўзжон Алимов ҳамда банк бошқаруви раиси ўринбосари Азиз Валиев билан меҳнат шартномалари ҳам муддатидан олдин бекор қилинган. Бошқарув таркибидаги ўзгартиришлар банкнинг ягона акциядори - "SUPPORT LEVEL" МЧЖ хатига асосан амалга оширилган.
Эслатиб ўтамиз, ўтган йил аввалида Давактив томонидан Ўзагроэкспортбанк сотилганлиги ҳақида эълон қилинган хабарда Артём Попов Россиянинг "Совкомбанк" ОАЖида Бошқарув раиси маслаҳатчиси лавозимида эканлиги кўрсатилганди.
Батафсил - https://bankers.uz/news/1041
-
2023-02-14 08:30:13+00:00
🏦 Асакабанкка бошқарув раиси тайинланди
2020 йил февраль ойидан "Ўзмиллийбанк" АЖ бошқарув раиси ўринбосари лавозимида ишлаб келаётган Қудратилла Асатуллаевич Туляганов "Асакабанк" АЖ бошқаруви раиси этиб тайинланди. Бу ҳақда Bankers.uz манбалари хабар бермоқда.
Қ.Туляганов 1982 йил туғилган. 2008 йил Тошкент Молия институтини, 2016 йил Банк-Молия академиясини тугатган. Банк тизимидаги иш стажи 23 йилни ташкил қилади.
Эслатиб ўтамиз, 2019 йилдан "Асакабанк" АЖ бошқаруви раиси лавозимида ишлаб келган Нодирбек Сайдуллаев ўтган йил октябрь ойида Марказий банк раисининг биринчи ўринбосари лавозимига тайинланган эди.
-
2023-02-15 12:35:44+00:00
🏦 Микрокредитбанк Бош Аудитор лавозимига танлов эълон қилмоқда
МKBank ("Микрокредитбанк" акциядорлик тижорат банки) Ички аудит департаменти директори — Бош аудитор лавозимига танлов эълон қилмоқда. Номзодларга соҳа бўйича етарли билим ва тажрибага эга бўлиш билан бир қаторда, олий иқтисодий маълумотга эга бўлиш, банк ёки молия тизимида камида 5 йиллик иш тажрибасига, шу жумладан, аудит тузилмаларида камида 3 йиллик раҳбарлик лавозимларида иш тажрибасига эга бўлиши каби талаблар қўйилган.
Шунингдек, номзоднинг ташқи аудитор сифатида иш тажрибасига эга бўлиши ёки турли халқаро сертификат (диплом)ларга эгалиги устунлик сифатида қабул қилиниши маълум қилинган. Номзодлардан ўз аризаларини 2023 йил 5 мартга қадар hr@mikrokreditbank.uz электрон почта манзилига "Аудит" белгиси билан маълумотнома юбориши сўралган.
-
2023-02-16 14:31:03+00:00
Наманганда мижозларнинг пластик картасидан 440 млн. сўм ечиб олган ходим қўлга олинди
Наманган вилояти Янгиқўрғон туманидаги банклардан бирининг ходими мазкур банкнинг Чуст филиалида ишловчи танишидан тегишли дастурий таъминотга кириш паролларини билиб олган ҳолда, ушбу филиалнинг 22 та мижозига тегишли пластик карта ҳисобварақларидан жами 440 миллион сўм ечиб олиб, ўз эҳтиёжи учун ишлатиб юборган.
Ҳозирда мазкур шахс ушланган ва ундан айбини тасдиқловчи далилий ашёлар, жумладан, мобил телефон ва банк транзакциялари олинган. Банк ходимига нисбатан жиноят иши қўзғатилган.
Батафсил - https://bankers.uz/news/1043
-
2023-02-17 17:04:30+00:00
🏦 Ориент Финанс банк акциядорлари таркибида ўзгаришлар рўй берди
"Ориент Финанс" хусусий акциядорлик тижорат банки акциядорлари таркибида ўзгаришлар рўй берган. Бу ҳақда банк томонидан Корпоратив ахборот ягона порталида маълум қилинган. Хусусан, банкнинг йирик акциядорларидан бири Сакен Полатовнинг банк акцияларидаги улуши 34,6 фоизга етган, шунингдек, жисмоний шахс Ситора Ахмеджанова банк акцияларининг 17,9 фоизига эгалик қила бошлаган.
Батафсил - https://bankers.uz/news/1044
-
2023-02-21 13:34:43+00:00
Олмалиқ шаҳрида фирма раҳбари 2,3 млрд. сўм кредитни талон-торож қилгани аниқланди
Тошкент вилоятининг Олмалиқ шаҳрида МЧЖ раҳбари ҳудудий тижорат банки филиалидан шаҳарда 2 та кўп қаватли уй-жой қуриш учун ажратилган кредит эвазига харид қилинган 2,3 млрд сўмлик қурилиш материалларини бошқа шахсларга сотиб юбориб, ушбу маблағларни ўзлаштириш йўли билан талон-торож қилгани аниқланган.
Ҳозирда мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда, дейилган Департамент хабарида.
Батафсил - https://bankers.uz/news/1046
-
2023-02-22 11:16:24+00:00
ТерДУ талабаси ўзи амалиёт ўтаган банк мижозининг 75 млн сўмини ўзлаштиргани айтилмоқда
Жорий йилнинг 20 февраль куни Термиз давлат университетининг 4-курс талабаси ўзи амалиёт ўтаётган банкда дастурий таъминот орқали нотаниш одамнинг картасини фаоллаштириб, мижознинг банк картасидан 75,7 млн сўм пул ечиб олгани айтилмоқда. Бу ҳақда Ички ишлар вазирлиги "Газета.uz"га маълумот берган.
Талаба ўғирланган пулларни турли банкоматлар орқали нақдлаштириб олган. Ҳозирда 26 ёшли фуқарога ЖКнинг "ўғирлик" банди билан жиноят иши қўзғатилган. Агар унинг айби тасдиқланса, фуқаро БҲМнинг 300 бараваригача миқдорда жарима тўлаши ёки 3−5 йилгача озодликдан маҳрум қилиниши мумкин.
-
2023-02-25 08:20:24+00:00
Сурхондарё вилоятининг иккита туманида жами 11,2 млрд сўм кредит маблағлари талон-торож қилингани айтилмоқда
Сурхондарё вилоятининг Олтинсой ва Термиз туманларида масъулияти чекланган жамият раҳбарлари жами 11,2 млрд сўмлик кредит маблағларини талон-торож қилган. Бу ҳақда Бош прокуратура ҳузуридаги Иқтисодий жиноятларга қарши курашиш департамент маълум қилди.
Хусусан, Олтинсой туманида МЧЖ раҳбари боғ ташкил этиш ва қишлоқ хўжалиги техникалари сотиб олиш учун ажратилган имтиёзли кредит маблағларини бошқа мақсадларга сарфлаб, жами 6,1 млрд сўмни ўзлаштириш йўли билан талон-торож қилган. Термиз туманида эса, 2 та МЧЖ раҳбарлари банкдан олинган кредит маблағлари эвазига қўшни Қозоғистон Республикасидан олиб келинган чорва молларни бошқа шахсларга сотиб юбориб, жами 5,1 млрд сўм кредит маблағини ўзлаштириш йўли билан талон-торож қилган.
Батафсил - https://bankers.uz/news/1049
-
2023-02-28 12:20:16+00:00
Марказий банк бир нечта банкларни огоҳлантирди
Марказий банкнинг Банк назорати қўмитаси томонидан жорий йил январь ойи давомида 9 та йиғилиш ўтказилган бўлиб, уларда рухсат бериш тартиботи билан боғлиқ ва кредит ташкилотларининг молиявий ҳолатига доир жами 26 та масала кўриб чиқилган.
Маълум қилинишича, Марказий банкнинг тематик ўрганишлари натижасида аниқланган камчиликлар юзасидан, бир нечта йўналиш бўйича камчиликлар бартараф этилмагани учун 6 та давлат банклари огоҳлантирилган.
Бундан ташқари, иқтисодий санкциялар ва экспортга тақиқлар билан боғлиқ хатарларни бошқаришга доир юклатилган вазифалар ижросини таъминлашда камчиликларга йўл қўйган 3 та банк ҳам огоҳлантирилган.
Батафсил - https://bankers.uz/news/1051