-
2023-03-01 11:03:17+00:00
ААҔАР САХА СИРЭ.
А. Никифорова "Көһөрүллүбүт олох".
Айталина Никифорова "Көһөрүллүбүт олох" диэн дьоҕус кээмэйдээх кинигэтин ааҕан бүтэрэн эрэбин. Бу кинигэҕэ биир сэһэн, үс кэпсээн киирбит. Бүтэрэ иликпин да буоллар кэлин быыс булан суруйбакка хаалыам диэн өрөбүлү туһанан санаабын кылгастык да буоллар суруйарга уонна үллэстэргэ тиэтэйэбин.
Кырдьыкпын билиннэххэ А.Никифорованы суруналыыс быһыытынан билэбин эрээри уус уран айымньыларын ааҕа иликпин. Онон ааптары кытта маҥнайгы билсиһиим диэххэ сөп.
Ааптар: "Мин ааҕааччым дьахтар", -диир. Ол да баар быһыылаах. Ол гынан баран бу сэһэни дьахтар аймах эрэ ааҕарыгар диэн буолбакка, ааҕааччы бары араҥатыгар туһуламмыт айымньы курдук көрдүм.
Сэһэҥҥэ икки кыыстаах куорат ыала уларыта тутуу дьалхааннаах олоҕун хайдах туораабыттара ойууланар. Мин өйдүүрбүнэн бу кэми уус уран литература ньыматынан анааран көрүү, өйдүү сатааһын саҥа саҕаланан эрэр. Ону Б.Павлов саҥа сэһэнэ, К.Эверстов "Күрүлгэҥҥэ" сабыс саҥа тахсыбыт сэһэнтэн быһа тардыыта туоһулууллар. Ити өттүнэн сэһэн бүгүҥҥү саха литературатыгар сонун көстүү.
Ыал аҕата театрга үлэлиир, артыыс, режиссер буолбатах эрээри тутаах киһи, декоратор диирим дуу. Ыал ийэтэ - дьиэ хаһаайката Боккуойа. Сэһэн саҕаланыытыгар социализм туругуран турар кэмин сүрүн тиэмэтэ - квартира үллэһигин айдаана. Ити кэми ааптар өҥө сөпкө талыллыбыт кырааскаларынан бэрт хомоҕойдук ойуулуур.
Сэһэн ортоку олуга - уларыта тутуу саҕаланыыта. Дьиэлээх хаһаайка үгүс сылларга мунньуммут ууруу харчытыттан илии соттон хаалыыта, аҕалара массыынаҕа киирэн биэрэн өлүүтэ. Аҕа аһыыта.
Маҥнай ааптар ыал аҕатыгар Уйбааҥҥа улахан болҕомто уурбат курдук, кэллэ - барда, тугу эрэ эттэ диэбит курдук суруйар, онон Уйбаан букатын самалык персонаж курдук көстөр. Уйбаан орто дойдуттан барбытын кэннэ эрэ сэһэн биир тутаах персонаһа буолара тахсар.
Мин саныахпар сэһэн саамай күүстээх түгэнэ Уйбаан өлбүтэ түөрт уон хонугу ааспытын кэннэ кыыһын түүлүгэр киирэн: "Ийэҥ миигин аһыйан орто дойдуттан ыытымаары гынна", - диэн үҥсүүтэ буолар. Искусство бэриниилээх үлэһитэ, дириҥ өйдөөх - санаалаах, сахалыы тулуурдаах уонна сэмэй Уйбаан уобараһа кэргэнин аһыытынан, кэмсинэр санааларынан - оноолорунан арыллар.
Сэһэн түмүгэ - Боккуойа кыра кыыһынаан балтыгар Молдавияҕа баран кэлиилэрэ, Боккуойа эрин аһыыта мүлүрүйүүтэ, саҥа олоххо киирии ойууланар.
Кинигэ 500 ахсаанынан тахсыбыт. Булан ааҕыҥ. Саха литературатын таптааччы кэрэхсии, астына, дуоһуйа ааҕар айымньыта баар буолбут. Икки күннээх өрөбүл миэхэ ааҕыы бырааһынньыгын бэлэхтээтэ. Бу быстах суруйуу ырытыы ахсааныгар киирбэт, "кыалларынан бу айымньыга болҕомтоҕутун ууруҥ" диэн саҥа аллайыы быһыытынан ылыныҥ уонна бэйэҕит эмиэ тугу сөбүлээн аахпыккытын дьоҥҥо тыллыырга тиэтэйиҥ. Онто суох, төһөлөөх талааннаахтык суруллубут айымньы ааҕааччытыгар тиийбэккэ сытара буолуой?
Уйбаан Самаайап, олунньу 24 күнэ, 2023 сыл.
-
2023-03-02 13:44:44+00:00
#КК_Кэпсээн
ТУОЛБУТ ЫЙ
Бастакы чааһа
Ааптар: Наталья Рязанская
Халлааҥҥа туолбут ый Тууна хоһун сып-сырдыгынан мичээрдии одуулуур. Түүн оройо буолбут да, эдэр дьахтар утуйар уута букатын уйгууран хаалла. Аттыгар быыкаа Маасыҥката арай кини санаарҕыырыгар кыһаммакка, күн кыһалҕата суох утуйан буккуруйа сытар. Таһырдьа ыт үрдэ. Тууна эмискэ оронуттан ойон турда уонна биирдэ-иккитэ хардыылаат, хоһун түннүгэр сүүрэн кэлэн сыста түстэ. Хас биирдии этин сааһа аһыллан, бүтүннүү кулгаах-харах буолан таһырдьаны манаста. Сүрэҕэ, доҕуурга иҥнибит туллук оҕотунуу, тохтоло суох толугуруу мөҕүстэ.
Салҕыыта: https://kiinkuorat.ru/articles/tuolbut-yy
https://t.me/kiin_kyorat_gazeta