-
2023-02-02 10:24:40+00:00
🤡Гамяльчука Дзмітрыя Шаўчэнку завочна асудзілі да 15 сутак арышту
Сёння ў судзе Цэнтральнага раёна Гомеля разглядзелі справу 47-гадовага рамесніка Дзмітрыя Шаўчэнкі. Яшчэ 12 снежня 2022 года супраць яго склалі пратакол паводле арт. 19.11 КаАП (распаўсюд экстрэмісцкіх матэрыялаў).
Сам Дзмітрый на суд не прыйшоў, але гэта не перашкодзіла суддзі Віктару Казачку разглядзець справу без асобы, у дачыненні да якой вядзецца адміністрацыйны працэс. У выніку суд пастанавіў прызнаць Шаўчэнку вінаватым і прызначыць яму 15 сутак арышту.
-
2023-02-06 07:01:01+00:00
📍Вакаліста гурта «Бан Жвірба» Дзмітрыя Гаўрыліна арыштавалі на 15 сутак
Пра гэта паведаміў актывіст Ілля Міронаў. Гаўрыліна разам з жонкай затрымалі ў канцы студзеня. 9 лютага Дзмітрый павінен выйсці з гомельскага ІЧУ на волю.
-
2023-02-08 07:40:27+00:00
❗️Баранавіцкага актывіста Мікалая Чарнавуса-малодшага арыштавалі на 15 сутак
Учора, 7 лютага, у Баранавічах над актывістам адбыўся суд. Яго абвінавацілі ў "распаўсюдзе экстрэмісцкіх матэрыялаў" паводле арт. 19.11 КаАП. Суддзя Арцём Падалянец прызнаў Мікалая вінаватым і прызначыў яму 15 сутак арышту.
Па папярэдняй інфармацыі, супраць Чарнавуса-малодшага ўзбуджана крымінальная справа паводле арт. 368 КК (абраза Лукашэнкі).
Нагадаем, Мікалая затрымлі 2 лютага ў Баранавічах, дома ў яго правялі ператрус. Па інфармацыі ад суседзяў, а 6 раніцы прыкладна 10 сілавікоў у бронекамізэльках і са зброяй атачылі прыватны дом, а потым пералазілі праз плот і гучна грукалі па вокнах з патрабаваннем адчыніць дзверы. Пасля ператрусу Мікалая вывелі ў кайданках з рукамі за спіной.
-
2023-02-09 14:56:43+00:00
⚖️Суткі за "пікетаванне" ў чат-рулетцы і грамадскія працы за "экстрэмісцкі" рэпост: вынікі адміністрацыйнага пераследу ў студзені
Паводле інфармацыі праваабаронцаў "Вясны", у студзені было затрымана не менш за 350 чалавек — прыкладна 11 чалавек у дзень. Суды ў мінулым месяцы разглядзелі мінімум 141 палітычна матываваную адміністрацыйную справу. Беларускімі суддзямі было прызначана не менш за 44 адміністрацыйныя арышты, 10 штрафаў, а таксама зафіксаваны адзін выпадак прызначэння грамадскіх прац на тэрмін 60 гадзін.
Так, напрыклад, двух жыхароў Рагачова асудзілі за "пікетаванне" ў чат-рулетцы бел-чырвона-белым сцягам. Згодна з пратаколам аднаго з іх, "падчас гутаркі ў інтэрнэце мужчына дэманстраваў БЧБ-сцяг, а відэаролік размовы быў размешчаны ў прапагандысцкім тэлеграм-канале ЖС Premium". Пры гэтым відэа на канале з'явілася днём 4 студзеня, а ўвечары хлопцы ўжо былі затрыманы.
"Вясна назірае" склала традыцыйны спіс самых дзіўных і недарэчных прычын, па якіх беларусаў судзілі ў студзені 👉 bit.ly/3lcmYan
-
2023-02-22 10:42:42+00:00
📍Гомельскага юрыста Алега Шамкіна арыштавалі на 10 сутак
У Гомелі 21 лютага ў абласное аддзяленне КДБ быў выкліканы індывідуальны прадпрымальнік і юрыст Алег Шамкін. Але на волю ён так і не выйшаў. У Савецкім РАУСе на яго склалі пратакол паводле арт. 19.11 КаАП за распаўсюд экстрэмісцкіх матэрыялаў.
Сёння над Алегам адбыўся суд. Па інфармацыі Іллі Міронава, вынікам стаў 10 сутак адміністрацыйнага арышту.
-
2023-02-26 06:26:53+00:00
🤡Жанчыну адправілі за краты за заклік адсвяткаваць адкрыццё хаткі для котак
У Оршы ў пачатку лютага адбыўся суд над зааабаронцай Аленай Мірашнічэнка паводле арт 24.23 КаАП (несанкцыянаванае масавае мерапрыемства). Алену па позве выклікалі ў міліцыю, дзе адразу арыштавалі. Цяпер стала вядома, што яе абвінавацілі ў тым, што яна ў Viber у суполцы "Хвосцікі", створанай для дапамогі бяздомным жывёлам, "пакінула заклік узяць удзел у святкаванні адкрыцця хаткі для котак з сумесным чаяваннем".
У пастанове суда адзначылі, што пры вызначэнні віду спагнання, суддзя ўлічвала "характар і ступень грамадскай шкоднасці здзейсненага адміністрацыйнага правапарушэння, які адносіцца ў адпаведнасці з КаАП да катэгорыі грубых, накіраваных на дэстабілізацыю абстаноўкі ў грамадстве і дзяржаве".
Суддзя Юлія Вяршыніна арыштавала Алену на 15 сутак.
📸Фота ілюстрацыйнае
-
2023-02-28 13:16:07+00:00
📍У Баранавічах актывіста Ігара Шумілава адправілі на "суткі"
Былога байкера Ігара Шумілава затрымалі 23 лютага. На наступны дзень яго асудзілі паводле арт. 19.11 КаАП за "распаўсюд экстрэмісцкіх матэрыялаў". Суддзя Вікторыя Пакунова прызнала яго вінаватым і арыштавала на 15 сутак.
Шумілаў мае інваліднасць трэцяй групы. 10 гадоў таму ён трапіў у ДТЗ і згубіў нагу.