-
2022-12-13 18:05:50+00:00
Қорин ғами
-
2022-12-13 13:03:51+00:00
Тушда чурвақалар билан Олой бозори ёнидаги Plov.uz емакхонасига кирдик. Интерьери жуда олифта, кираверишда калта кўйлак кийган қизлар кутиб оляпти.
4та ош, 1та чучвара, 4та жажжи сомса, 3та аччиқ-чучук, 2 чойнак лимон чойга 470 минг сўм тўладим. Қиммат анча, кутмагандим.
57 Канада долларига тенг бўпти. Бу пулга Канадада ҳам овқатланса бўлади. Лекин бунақа интерьер, сервис, идиш-товоқлар ишлатиладиган ресторанлар Калгарида камида 3 баробар қимматроқ бўларди.
-
2022-12-13 12:55:58+00:00
Яхши ишларни эътироф этаман.
Бугун Ташқи ишлар вазирлигида паспортга ҳужжатларимизни топширдик. Аниқланишича, паспорт катталарга 155 доллардан, болаларга эса 5 доллардан экан.
Ҳужжатларимизни қабул қилиб олган икки ёш йигит ҳушмуомала экан, бутун жараён давомида илиқ муомалада бўлишди, болалар учун ҳам шароит яратиб беришди.
ТИВда паспорт олувчилар қарийб йўқ, шунинг учун навбат кутмадик, ишимиз тез битди. Идора биноси ҳам шинамгина, иссиққина. ОВИР билан солиштирганда ер билан осмончалик фарқ.
ТИВ йигитларига раҳмат, паспорт чиқишини кутамиз энди.
-
2022-12-13 05:13:43+00:00
Биз Ўзбекистоннинг Вашингтондаги элчихонасида рўйхатда турганимиз сабабли яшил паспортимизни қизилига алмаштириш учун Ташқи ишлар вазирлигига мурожаат қилишимиз керак экан.
ТИВ орқали паспорт расмийлаштириш 1 БҲМ эмас, балки 150 АҚШ доллари экан. Битта паспорт 150 доллар, биз эса 5 киши.
Шундай бўлса-да, ТИВда 5 кишига битта анкета бланкасини беришди, ўзимиз ксерокопия қиволарканмиз. 750 доллар тўласак ҳам 5та анкетага арзимас эканмиз 😄
~~~
ДХМга бордим, анча тартиб бор. Ҳамма номерини кутяпти. Кираверишда икки киши одамларга ёрдам бериб туришибди. Қойил!
ОВИРга бордим, номерлар ишламаяпти, эскича “ит эгасини танимайди” режимида ишлашяпти.
-
2022-12-12 04:25:40+00:00
Тошкентдаман.
Совуқ едим. Мен бу ерга исингани келгандим, совуқ егани эмас. Қорга ҳам кўзларим тўйиб бўлган. Эритинглар-ей!
Баланд-баланд бинолар кўпайиб кетибди шаҳарда. Фақат уларга газ ва свет етса бас.
Кеча (якшанба куни) машина ҳайдадим. Жиннихона, аммо ваҳима қилишганича эмас. Иш кунлари ҳайдамаслик ҳақида огоҳлантиришди.
“Хумо” терминалларида Канада банки чиқарган Мастеркардим ишлади. Қойил.
Марказий кўчалар ҳай-ҳай қип қўйилибди, столбалари жимжимадор. Бошқа кўчаларнинг аҳволи ўша-ўша, ўзгармапти.
Канадада олти йил давомида Тошкентда бир кунда тушган чуқурларимдан кўра камроқ чуқурга тушгандим.
Ош едим, норин едим, сомса едим, лағмон едим. Мазза!
Мана шунақа гаплар. Яна янгиликлар бўлса хабардор қилиб тураман.
-
2022-12-06 12:06:35+00:00
Канаданинг ҳозирги бош вазири Жастин Трюдонинг онаси - Маргарет Жоан Синклер Трюдо (ўнгда) Самарқандда. У 1971 йили Канаданинг ўша вақтдаги бош вазири Пьер Эллиот Трюдонинг хотини сифатида Ўзбекистонга келган (#)
-
2022-12-06 06:24:44+00:00
-
2022-12-03 21:46:55+00:00
Ўзбек прогрессофоблари (тараққиёт душманлари) бошқа жамиятдаги маслакдошларидан кўра анча пухта кўринади. Яъни бизнинг жамиятга ҳали кириб улгурмаган ғоя ва қарашларни бошиданоқ қоралаб, қора пиар уюштириб, илдизига болта уришга ҳаракат қилади. Бу пухталикми ёки бетоқатликнинг экстремал кўринишими, билмадим. Лекин феминизм атрофидаги баҳслар мисолида шуни кўришимиз мумкин.
Феминизм ҳаракатининг моҳияти озгина ўқиган-билган одамга жуда яхши таниш. Унинг инсониятнинг янги тарихидаги ўрни ҳам беқиёсдир. Унинг радикал қаноти ҳам бор албатта. Аммо клерикаллар шу радикал қанотни баҳона қилиб, жамиятимиз учун муҳим бир ғояни дискредитация қилишга уринмоқда.
Аслида улар ўзларига қарши кўп қўлланадиган приёмга мурожаат қилмоқда. ИШИД ва Толибон лидерларидан, агрессив дин тарғиботчиларидан радикал руҳдаги ўнлаб иқтибослар келтириб, "мана шуларни ҳимоя қиляпсан" дейиш мумкин (шундай қилинади ҳам). Лекин динчилар одатда "умумлаштирма, ҳамма унақа фикрда эмас" деб норози бўлади. Айтмоқчи бўлганим, феминистлар ҳам унақа фикрламайди. Мутлақ кўпчилиги унақа фикрламайди.
Ўзи Ўзбекистонда радикал феминизм йўқ. Ҳали аёлларнинг элементар хавфсизлиги таъминланмаган жамиятда феминизмнинг экстремал талабларига эҳтиёж йўқ, элементар ҳуқуқлар ва зўравонлик муаммоси кўтарилади кўпроқ. Шунга қарамай, юқорида айтганимдек, бу ғоя ҳаракат ўлароқ шаклланиб улгурмасиданоқ қуритишга интилишмоқда. Аёлларга нисбатан зўравонлик билан боғлиқ оммавий кейслар кун сайин кўпаётган, ҳатто ёш, ўқимишли зиёли йигитлар ҳам аёлларни уйдан чиқармаслик керак деган мафкурада собит турган жамиятда феминизмга қарши курашишни жамиятни тараққиётдан узоқда, турғунликда ва патриархатда ушлаб туришга қаратилган бузғунчи ҳаракат деб аташ мумкин. Лекин феминизм вужудга келганида Ғарбда ҳам бундай қаршилик жуда кучли бўлган, шунга аслида бу нормал ҳолат. Жамият шунақа ғоявий курашларда ривожланади. Юз йил олдин Ғарбда ҳам эркакларнинг кўпчилиги антифеминист бўлган, ҳозир эса буни эслаб, уялиб юришибди. Бизда ҳам шундай кунлар келади (юз йил кутмаймиз деб умид қиламан).
Қуйидаги скринда келтирилган ҳар бир иқтибосга қарши минглаб конструктив, таъсирли ва мазмунли иқтибосларни келтириш мумкин. У ер-бу ердан териб келинган беш-олтита иқтибосга қараб ҳукм ўқиб қўйиш зиёли одамга хос эмас. Шунга турли қарашларни (жумладан мени ҳам) ўқиб кўриб, хулоса қилишни тавсия қиламан. Сўзимни эса машҳур феминистлардан бири - француз адибаси ва файласуфи Симона де Бовуарнинг бугунги Ўзбекистон учун долзарб сўзлари билан якунлайман:
Аёлнинг кўзларига қанча ёш сиғиши мумкинлигини айтсам ишонмайсиз.
-
2022-12-03 16:03:17+00:00
Альберта «заправка»ларида қизиқ қоида бор: арзон бензин қолмаса, қимматини арзонининг нархига сотади, шохобчани ёпиб қўймайди.
Суратга аҳамият беринг, энг арзон 87-бензин (Европа ва Ўзбекистондаги 91га тўғри келади) 1,33 Канада (1 АҚШ) доллари туради, аммо у қолмагани учун 94-бензин (Ўзбекистонда 99га мос)ни шу нархга сотяпти. Ҳолбуки, одатда бу бензин 20 фоиз қимматроқ юради.
-
2022-12-02 05:51:54+00:00
Совуқ бўлган пайтларда уйдан кўчага чиқадиган эшикнинг дастаги ҳўл бўлиб қолади. Сабаб конденсация.
Умуман олганда, қаттиқ совуқ пайти конденсация катта муаммога айланади. Ойналар, уч камерали бўлса-да, намланади, сув дераза токчасига тўпланади ва тунда музлайди. Натижада токчага, буёққа зарар етади. Сув кўп тўпланаверса, мўғор пайдо бўлиши мумкин.
Шунинг учун совуқ пайти уни яхшилаб вентиляция қилиш, ичкаридаги намликни 30 фоиздан паст ушлаш керак. Бундай қуруқ ҳаво терини, бурунни қуритади.
Канададаги аксарият уйларда вентиляция тизими бор. Шунинг учун вентиляция деганда деразаларни очиш билан эмас, вентиляция тизими орқали ташқаридан қуруқ ҳаво олиб киришни назарда тутяпман.
-
2022-12-02 02:59:08+00:00
Мавсумнинг биринчи экстремал совуқ ҳақида огоҳлантириш олдик. Тунда ҳарорат (шамол ҳисобига) -40 даражагача тушиши мумкин экан.
Уйлар, шукрки, иссиқ, бундай ҳароратларга мослаштирилган. Мактаблар очиқ, ҳаёт ўз йўлида давом этаверади.
-
2022-12-01 17:27:38+00:00
Ишхонадаги раҳбарлардан бири Гугл Транслейтни ўрганвопти, менга ўзбекча ёзяпти 😄 Кулранг фондаги хабарлар у, сиёҳранги — мен.
-
2022-12-17 10:15:23+00:00
Салқинлагани тоққа чиқдик.
-
2022-12-15 07:42:08+00:00
Яна кузатувлар:
Аҳмад Дониш кўчасида учта чала битган пиёдалар учун кўприк кўрдим. Зиналари ўта тикка. Портлатвориш керак. Жуда нотўғри қадам. Қийинчиликлар пиёдаларга эмас, машиналарга бўлиши керак.
Машиналар сигнал чалиши, секиииин тиқилиб келиши асабни бузяпти. “Поворотник”ни ёққанларни қўйи юборяпман лекин.
Йўл чизиқларига сон кирмабди, аксарият кўчаларда ўчиб кетган.
Шаҳарда чанг-тўзон сезиларли кўпайибди. Узоқдаги бинолар аввал тиниқ кўринарди, ҳозир эса хира кўриняпти.
Электрокарлар сони Калгаридагидан кўп. Қойил.
Хитой автомобилсозликда анча илгарилаб кетибди. Шимолий Америкада Хитой брендлари йўқ, кириб келишини кутамиз.
-
2022-12-15 06:18:29+00:00
Тошкентда автомобиллар сони кескин ортганини сездим. 2016 йилда бунчалик машина кўп эмасди. Светофорнинг битта циклида ўта олмаслик камдан-кам учрайдиган ҳолат эди. Ҳозир эса светофорда узоқ туриш одатий ҳолга айланибди.
Камералар бор жойда ҳайдовчилар “полоса”ларни босмасликка ҳаракат қилишяпти, стоп-линиядан анча берида туришибди. Иккинчи “полоса”дан чапга бурилишлар анча камайибди. Бу жуда яхши. Камераларни янада кўпайтириш керак.
Шаҳарда светофорлар сони кўпайибди. Аввал оддий “зебра” бўлган жойларга светофорлар қўйилибди. Буям яхши.
Лекин ҳалигача 8та “полоса”ли кўчаларда светофорсиз “зебра”лар кўп. Бу жуда-жуда ёмон ва хавфли. Юнусобод ҳокимияти олдидаги пиёдалар ўтиш жойига ҳалиям сон кирмапти. Липиллайдиган “знак” — ғирт шармандагарчилик.
Машиналар, светофорлар, камералар кўпайгани ортидан автомобилларнинг ўртача тезлиги ҳам пасайибди. Маъқул!
Энг жиннихона чорраҳалар ўзгартирилиб, сал тартибга солинибди. Масалан, Аҳмад Дониш ва Мойқўрғон кўчалари чорраҳасидаги ўзгартиришларни оқлайман.
Аммо иккинчи даражали кўчалар, Тошкент ҳалқа йўли ўша-ўша дабдала. Ҳайдовчилар ҳам тор кўчаларда “встречка”дан обгон қилишяпти. Ҳаммаёқ “пробка” бўлган жойларда тутқаноқ тутгандек силтаб-силтаб ҳаракатланишяпти. Пиёдалар устига тўғри босишяпти.
Камера бор жойларда эса мўминтой бўлиб юришибди. Демак камераларни кўпайтириш керак. Қалаштириб ташлаш керак.
2016 йилга солиштирганда прогресс, аҳволни ўнглашга ҳаракат бор, аммо етарли эмас. Бу ҳаракатларни камида 10 бараварга кучайтириш, тезлаштириш керак, токи кўчаларда ўлимлар сони нолга тушмагунигача.
-
2022-12-21 19:50:09+00:00
Бугун “Орзулар мавсуми” номли концертга тушдик. Концертда бир қатор таниқли хонандалар иштирок этишди.
Бизга жуда ёқди: қўшиқлар, саҳна безаклари, санъаткорлар чиқишлари, визуал эффектлар, бари зўр. Концертнинг техник қисмлари Калгаридагилардан яхши бўлса яхши-ки, кам эмас.
Концертда қўшиқлар мусиқаси Ўзбекистон давлат симфоник оркестри ва хори томонидан ижро этилди. Санъаткорлар фақат жонли ижрода айтди.
Лекин бир нарса кўнглимни хира қилди: аудиториянинг қарийб 80 фоизи (чамамда), концерт бошловчиларининг барчаси ўзбек бўлишига қарамасдан, у рус тилида олиб борилди. Концерт давомида экранларда кўрсатилган матнлар ҳам русча. Ҳатто Севара Назархон томошабинлар билан рус тилида мулоқот қилди.
Тушунмайман, нега ҳалигача рус тили ўзбек тилидан устун кўрилади?
-
2022-12-21 17:21:16+00:00
Чекни кўришимдан аввал…
-
2022-12-21 03:30:08+00:00
Ўқувчилар курткада ўтиргани ҳақида.
Шу кунларда Альбертада қаттиқ совуқ бўляпти: кундузи -25, тунда эса -35гача тушяпти. Шунақа кунда Исмоилнинг мактабида бойлер ишламай қолибди. Шу ҳақда мактаб директори имейл ёзибди.
Блум хонимнинг айтишича, эрталабдан мактаб иссиқ бўлган. Кун давомида ҳарорат пасайишни бошлагач, мактаб маъмурияти усталарни чақирган ва улар иситиш тизимини тузатишган.
“Қисқа муддат давомида болалар курткада ўтиришди, аммо дарслар одатдагидек давом этди”, — дейди миссис Блум. “Иситиш тизими тўлиқ ишлаяпти, эртага дарслар режадагидек давом этади”, — деб қўшимча қилди у.
Суратда: мактаб директоридан келган мактуб.
-
2022-12-22 13:08:39+00:00
Ютубда савол беришибди. Нима деб жавоб қиламиз? Комментларда айтворинглар-чи 😄
-
2022-12-22 08:03:52+00:00
«УЛАР» лойиҳасининг 34-сони меҳмони Дарё.уз асосчиларидан бири, «Замбаракнинг ўқи» телеграм канали муаллифи Фарҳод Файзуллаев. Биз улар билан Канадага кетиш сабаби, шахсий уйи, Россия бошлаган уруш, сиёсат, Европадаги миллатчилик ҳақида гаплашдик.
📹Тўлиқ интервьюни кўриш учун: https://youtu.be/ye_TdepRd4o
-
2022-12-22 06:44:26+00:00
Табақаланиш янада кучайган кўринади.
Қиммат ресторанларда битта овқат камида 100-150 минг сўм. Олдида қиммат машиналар, уларнинг номерлари ундан-да қиммат. Мижозлар башанг кийинган. Мана шундай ресторанга кирсангиз, қандайдир жуда бой мамлакатда юргандек тасаввурга эга бўласиз, муаммоларни унутасиз.
Шу билан бирга кўчада шунақа эски машиналар ҳам юрибдики, юрганига ҳайратланасиз. Кеча ўз кўзим билан кўрган ходиса: светофорда Mercedes EQS 580 турибди, ўлдим деганда 150 минг доллар. Ëнида озгина жой қолган экан, ўша ерга томига бир-балолар ортилган эээээээски Жигули 06 тиқиляпти. Юрагим орқага тортиб кетди, тўғриси. Мерсни сал қириб қўйса борми, уйини сотсаям етмайди пули тўғрилаб беришга.
Шаҳарнинг шундоққина ташқарисида баъзи маҳаллаларга бордимки, йўллари ўйдим-чуқур, бирорта столбада чироқ йўқ. Лекин пойтахтда столбаларга ялтир-юлтур неон чироқлар илинган.
Тўғри, кўп ток емас балки, лекин уйида на чироғи, на гази бор одамлар олдида сал уялдим. Нима кераги бор бунақа одамлар кўзини ўйнатишни. Бир ватт электрга зор одамлар бор-ку мамлакатда?
Одамлар бойигани яхши, лекин табақаланиш ўсаётгани хурсанд бўладиган ходиса эмас.
-
2022-12-22 05:44:58+00:00
Ўзбекистонда хусусий бизнес сўнгги йилларда сезиларли ривожланибди.
Зўр ресторанлар кўпайибди, улар одамлар билан гавжум. Хизмат кўрсатиш соҳаси ҳам зўр: товарлар бир—икки кунда етказиляпти. Ҳаммаёқ дўкон, демак кичик бизнесни юритиш осонлашибди.
Онлайн хизматлар ва банкинг ҳам анча илгарилабди. Канадада очилган кредит картам билан аксарият жойларда пул тўлай оляпман. Конвертация курси ҳам яхши, комиссия жуда кичкина.
2016 йили, мен Канадага кўчиб кетган пайт жуда кучли стагнацияда эканимизни тушуняпман. Барча соҳалар “зачистка” қилинганди ўзиям.
Бир нарса лекин ёқмади: тартибсизлик. Пластик ва шишадан қурилган дўконлар бетартиб қуриб ташланган. Дом тагиям дўкон, тротуар ҳам дўкон, ҳаммаёқ дўкон.
Ресторанлар ҳам хоҳлаганича тротуарларни эгаллаб олган. Олдида машиналар уч қатор қилиб тахтлаб ташланган.
Шаҳарда қандайдир режа бўлса-да, ўша режа билан қурилиш олиб борилса… Ҳа йўқ, бу утопия бўлса керак.
-
2022-12-23 18:33:09+00:00
4 йил олдин Блогерлар чемпионатида фарммафия ҳақида пост ёзганимда, роса шов-шув бўлганди. Менга “эҳтиёт бўл, энг қўрқинчли мафия фарммафия бўлади, отиб кетишмасин” дейишган. Яна айтишганки, “рисоладаги ҳолатда соғлиқни сақлаш тизими фармсаноатга буюртма беради, бизда эса фармсаноат соғлиқни сақлашга буюртма беради, соғлиқни сақлаш унинг буюртмасига кўра ташхислар қўяди, рецепт тизимининг ҳануз жорий қилинмаганига шу сабаб”. Буларни мишмиш деб шундай қулоғимнинг ёнидан ўтказворганман.
Дори воситалар ортидан бирданига 15 (17) нафар бола ўлгани ҳақидаги хабар шу мишмишларни эсга солди. Ишчи гуруҳ тузилди ва ўрганяпти дейилди, бўлди. Ҳуқуқ-тартибот органлари шуғулланяптими? Тергов-суриштирув, жиноят иши очиш деган нарсалар йўқми?
17 нафар фариштани бирданига йўқотдик. Бу миллий фожиа, аламли. Ҳамон дорихоналарда дорилар рецептсиз сотиляпти. Бу миллий хавф-ку. У дори номли заҳар қай йўллар билан дорихонада пайдо бўлди? Ўша йўллар орқали бошқа заҳарлар ҳам келиб қолмагани ва бировнинг жонига хавф туғдирмаслигига кафолат борми?
Бу масалани жиддий кўтариш керак. Битта болани дунёга келириб катта қилиш ўзимас. Биз 36 миллион бўлсак-да, йилига 900 мингтадан кўпаяётган бўлсак-да, ҳар бир фарзандимиз қадрли. Саволларга жавоб, айбдорларга жазо, бошқа қайтарилмаслигига кафолат керак.
-
2022-12-24 14:19:15+00:00
Ўзбекистонлик маркетинг ва брендинг мутахассиси, тадбиркор, Lokals брендинг агентлиги раҳбари, адаш Фарҳод Норбаев билан Канада ҳаёти, у ерда тадбиркорлик ва бизнес ҳақида рус тилида сўзлашдик.
Кўриб, лайк босиб, улашиб қўёрослар — https://youtu.be/bBmvwRmoDmY
-
2022-12-25 19:04:53+00:00
Ҳеҳ, ёқмай қолсин. Бир сўм ҳам тўламайман.
-
2022-12-25 08:45:51+00:00
Бир хил қутбли магнитларни бир-бирига яқинлаштирсангиз, қочади, шундайми? Тошкентда машина хайдаш ҳам шундай экан.
Секин тиқилиб келавераркансиз, ёнингиздаги машинаям секин қочаркан. Худди магнитга ўхшаб.
Бир неча марта “поворотник”ни ёқиб, кутдим, ҳеч ким қўйиб юбормади. Энди мана секин чиқиб келишни ўргандим.
~~~
“Аварийка” ёқиш ҳам удум бўлибди.
Пиёдани ўтказворишдаям аварийка ёқишяпти. Йўлингизни сиқиб кетсаям, аварийка ёқиб, узр сўраб қўйишяпти.
Олдимда “поворотник”ни ёқиб, полосамга ўтмоқчи бўлганларга йўл беряпман. Кейин аварийка билан раҳмат айтиб кетишяпти. Шунақа қилишса хурсанд бўламан, йўл бераман. Лекин сиқиб кетиб, кейин “узр” сўраганларни сўкяпман.
~~~
Кўчаларда ёрқин реклама эълонлари ёмон чалғитяпти. Бекорга ривожланган мамлактлардаги шаҳарларда LED-экранларга чегаралар ўрнатилмаган.
Масалан, Уч қаҳрамон айланмаси. Қоп-қоронғу, бирорта столба ёқилмаган. Лекин ўртага ҳаддан ташқари катта ва ёруғ экран. Ранглари шунақанги тез ўзгарадики, кўзни қамаштириб юборади. Бунақа шароитда пиёдаларни ҳам, бошқа машиналарни ҳам кўриш қийин.
Машойиҳлар айтганидек, “соққани қилиш кере”, қолгани бир гап бўлар.
-
2022-12-27 11:19:05+00:00
Нормал давлатда вазир ва яна бошқа алоқадор амалдорлар истеъфога чиқарди. Пешкалар эмас.
Нормал давлатда вазирлик ва алоқадор ташкилотларнинг тити-питиғи чиқарилиб, текшириларди. Одамлар ишхонасидан наручникларда опчиқиб кетиларди.
Нормал давлатда, 18 норасида ҳаққи, мотам эълон қилинарди.
Нормал давлатда бу фожеа телевидение, радио, ижтимоий тармоқлар, чойхоналарда тўхтовсиз муҳокама қилинарди. Журналистлар ҳаммасини кавлаб, чириган тизимни очиб ташлашарди.
Нормал давлатда-да, мунтазам ренессансда бўладиган давлатда эмас.
-
2022-12-27 11:14:02+00:00
Самарқанддаги болалар шифохонасида Ҳиндистонда чиққан Док-1МАКС деган дорини ичиб, вафот этган болалар сони 15 нафар эмас, 18 нафар экан (яхшиям омбудсман бор экан, йўқса, менимча, қурбонлар кўпроқ экани ҳеч қачон айтилмасди); ҳаммаси ҳам Самарқанддан эмас, ён-атроф вилоятлардан бўлганлари ҳам. Болалар омбудсманининг аниқлашича, вафот этган болаларнинг бари 6 ёшдан кичик, 15 нафари эса 3 ёшгача бўлган болалар (даҳшат!). Қўшимча қилинишича, “Самарқанд шаҳар прокуратураси ҳар бир ўлим ҳолати бўйича суриштирув-тергов олиб бормоқда”.
Болалар омбудсмани бу мавзуни эслатгач, Соғлиқни сақлаш вазирлиги ҳам тилга кирди: шу ўлимлар сабабли 7 киши ишдан олинибди (ким улар, қаерда ишлайди, бу воқеаларга қанчалик алоқадор, айби нима – айтилмаган), тўпланган барча ҳужжатлар ҳуқуқни муҳофаза қилиш органларига юборилибди. Тушунишимча, икки ой ичида 18 бола бир доридан заҳарланиб ўлганига қарамай, ҳали ҳам бирор жиноят иши қўзғатилмаган.
Дарвоқе, “заҳарланиш” деган жойи бўйича – ССВнинг маълум қилишича, “олиб борилган дастлабки ўрганишлар дорининг ушбу серияси таркибида этиленгликоль мавжудлигини ҳам кўрсатган. Ушбу модда заҳарли”. Мана шу жойига тушунмадим очиғи – дорининг ушбу серияси таркибида шунақа заҳарли модда борлиги қачон аниқланиши керак эди?
Мингта қонун, ҳужжат, ҳар турли санпинлар чиқариб ташлагансизлар-ку, ўшаларда ёзилган тартиб-қоида бўйича “дорининг ушбу серияси таркибида” заҳарли модда борлиги қачон аниқланиши керак эди? Дорини Ўзбекистонга олиб кириш вақтидами? Шундай дорини ичиб, аҳволи ёмонлашган биринчи боланинг ўлимидан кейинми? Бешинчи ўлимдан кейинми? 10-ўлимдан кейинми? 15-ўлимдан кейинми? Қачон?
Дорининг “ушбу серияси таркибида” шундай заҳарли модда борлиги нега 18 бола ўлгунича аниқланмаган? Ким жавоб бериши керак бунга? Шуни аниқлашга масъул бўлган масъул ким? Шу масъулнинг устидаги масъул ким? Сизлар ҳам одаммисизлар? Қанақа одамсизлар?
Одам дегани сал-пал қўрқади. Қўрқиши керак, ҳар ҳолда. Булар қўрқмайди. Ҳеч ким ва ҳеч нарсадан қўрқмайди. Менимча.
-
2022-12-28 19:54:40+00:00
Дорилар ҳақида.
Дорилар рекламаси кўп. Дорихоналар ачиб ётибди. Дорилар истеъмоли эса космосга учиб кетган.
Анув куни битта рекламага кўзим тушди: “қишда иммунитетингизни оширинг, касал бўлмасингиздан профилактика учун фалон дорини ичинг.”
Ақл бовар қилмайди. Одам ҳали тузук, лекин олдиндан дори ичиш тавсия қилиняпти.
~~~
Бизнинг оилада олтин қоида бор, болаларгаям, катталаргаям тегишли: 3 кун кутиш.
Иситма чиқса, бола қайт қилса, ичи кетса, ва ҳ.к. ва ҳ.к. — 3 кун кутамиз. Дарров дори тиқиштирмаймиз. (Бир ёшгача бўлган чақалоқлар бундан мустасно)
Иситма 39дан ошсагина парацетамол берамиз. Ва кутамиз.
3 кун ичида иситмаси тушмаса, ёки аҳволи яхшилашмаётган бўлса, докторга кўринамиз. Чунки 3 кун муддатдан аввал докторга учрасангиз, 99 фоиз ҳолатларда парацетамол ва кўп-кўп суюқлик буюради.
Ўзбекистонда пайтимизда адам доим камида иккита, иложи бўлса учта докторга кўриниб, кейин қарор қабул қилиш кераклигини уқтирардилар.
~~~
Дори кўп ичишда одамларни айблашим қийин. Медицина фалаж ҳолатида, докторлар энг қуйи қатламга тушириб қўйилган пайтда одамларнинг умиди шу рекламаларида кўрган дорилардан-да.
Ковид пайтида одамларга гидроксихлорохин тарқатган соғлиқни сақлаш тизимидан яна нима кутиш мумкин?
Тизим ишламаганидан кейин, ундан нажот бўлмаганидан кейин, одамлар нажотни дорилардан излайди-да.
~~~
Хусусий клиникалар ҳам тўлиб-тошиб кетибди. Хоҳласангиз томоғингизни ювдирасиз, истасангиз капельница оласиз, ўзингизни-ўзингиз “даволайсиз”. Хусусий клиникаларнинг бирортаси клиент келганда “сизга бу муолажа керакмас” деб айтармикин?
~~~
Антибиотикларга резистентлик (қаршилик) аҳоли орасида қанақа экани ҳақида ўйлашгаям қўрқаман. Эээҳ…
-
2022-12-28 15:28:43+00:00
Адам стейк пиширдилар бугун.
-
2022-12-30 05:38:42+00:00
Pasaytirilgan stavka bilan bayram krediti 💫
TBC Bankdan yangi yil aksiyasi.
1 kungina qoldi! -15% gacha chegirma bilan TBC Kredit olishga ulguring.
Faqat 26-30-dekabr kunlari. Arizani ilova orqali istalgan payt rasmiylashtiring va 5 daqiqada 50 mln so'mgacha ega bo'ling.
Reklama
-
2022-12-30 13:41:08+00:00
Тошкент кўчаларида юриб, бир нарсани сездим: жуда сассиқ, тутун ҳиди. Машинада “печка”ни ёқсангиз, кўчадан кирган тутун ҳиди димоғингизга “гуп” этиб уради.
Бунга сабаб сифатсиз бензин ва “марални” эскирган автомобиллар бўлса керак, деб таҳмин қилдим.
-
2022-12-31 19:32:12+00:00
Янги йилингиз билан!
-
2022-12-31 16:59:43+00:00
2020 йилдан бери дунё нотинч. 2023 қанақа келаркин?
-
2022-12-31 09:55:16+00:00
Янги йилингиз муборак, азизлар! Янги йилда барча яхши ниятларимизга етишни насиб қилсин.